MANCHESTER UNITED LEH MILARTE

Mizoram ațang pawha thih ngam dawna kan lo țan ve Manchester United țantu zingah hian khawvel mi lar an kat nuk mai.An zinga țhenkhat lo tarlang ila:

10.Kym Marsh- He British zaithiam leh lemchan thiam ni bawk hi a zaithiam bakah a hmelțhatna hi a larpui hle.Pop group Hearsay ațanga a ban hnuah television show lamah a inhmang chho a.Kumin January khan a pasal nen an ințhen fel bawk!!!

9.Sachin Teldulkar: "The Master Blaster" hi India fa hrin zinga chhuanawm ber pawl a ni awm e.Cricket khawvela a ropui zia chu sawiin a siak lo a,United fan rinawm a ni lehzel hian a ropuina a ti zual!!! India rama civilian chawimawina sang ber Bharat Ratna dawng thei naupang ber leh Sportsperson zinga dawng hmasa ber a ni bawk.

8.Rey Mysterio: Wrestling khawvela '619' larpuitu hi a fapa nen United fan ruhkawl an ni a,Old Trafford dressing room pawh a tlawh ve ngat tawh!!!

7.Floyd Mayweather: Pound for pound boxer ropui hi Red Devils jersey ha chunga thla a la kan hmu fo tawh awm e.City fan Ricky Hatton nen an inhnek dawn pawhin United jersey a hak khum ngat a nih kha.

6.HARRY STYLES: One Direction member hi band lama a țhaiante Zayn Malik leh Louis Tomlinson te ang bawka Uniyed tana rinawm a ni a.Rio Ferdinand a duh hle a,a jersey nen pawh thla a la fo.Twitter lamah pawh Rio nen hian an inbe fo a ni awm e.

5.Rory Mcilroy: Kum 25 a upa world no.1 golfer hlui hian United player zingah Beckham,Heinze,Evra leh Roy Keane te a ngaisang zual a.PGA Tour a $10m hlawh theih naupang ber hi Man United jersey nena a thlalak hmuh tur a tam hle bawk.

4.MICK HUCKNALL: Kum 54 a upa British zaithiam leh hla phuahthiam hi 'Simply Red' band ațanga khawvelin a hriat a ni a.Kum 8 mi lek a nih ațanga United țan tawh a ni a,Eric Cantona nen an inkawm ngeih hle a,Sir Alex nen pawh inkhel an en dun fo țhin.

3.MEGAN FOX: He lemchanthiam nen club thuhmun kan țan thei ringawt pawh hi a va vanneihthlak em!!! Chicharito t-shirt nen khawlaia a leng kha a larpui hle a nih kha.

2.JUSTIN TIMBERLAKE: He zaithiam leh lemchan thiam hi entertainment khawvela a hlawhtlinzia chu sawi nawn a ngai awm lo e.Alan Smith nen țhianțha an ni a,Old Trafford ah pawh inkhel a en ve fo.

1.USAIN BOLT: He khawvela tlanchak ber Bolt hi United fan zinga thawm nei na ber pawl a ni awm e.United tan a khel dawn tih thawmte kha British media ho chaw tui ber pakhat a ni a,he pa hi chu Old Trafford lamah pawh hmuh tur a awm nual țhin.2011 Champions League final a United special guest ni tawh ngat kha a ni!!!

Anni bakah hian India cricket captain leh India a BPL Ambassador MS Dhoni te,Cricketer lar Yuvraj Singh,British actor Ian McShane,rapper lar Drake,model chhelo Imogan Thomas,zaithiam chuai theilo Enrique Iglasias,cricketer hlawhtling Chris Gayle,X-Factor winner Alexandra Burke,lemchanthiam Brad Pitt,boxer rothap Derek Chisora,actor Orlando Bloom leh Bollywood lalpa Shahrukh Khan te hi a langsar zual an ni awm e.

(pic:Kym Marsh)

WAYNE ROONEY LEH RECORD

Kum 2002 October ni 19 a ni a,Everton tana chakna goal ropui a thun hnu lawkah commentator Rob Palmer chuan "Ladies and gentlemen,introducing 16 year old Wayne Rooney" tiin khawvel hmaah Rooney a pholang.Kum 12 a liam leh meuh chuan football khawvelah sulhnu hrawl pui pui a hnutchhiah ta nual mai.

1.A hunlaiin Premier League a goal thun thei naupang ber a ni a,Arsenal laka goal ropui a thun khan kum 16 leh ni 360 chauha upa a ni.Kum 2003 February thlaah England tan khel tura koh a ni a,England tana khel thei naupang ber leh goal thun thei naupang ber record a siam a.Euro a goal thun thei naupang ber record chu Euro 2004 khan a siam bawk.

2.Kum 2004 a pound maktaduai 25.6 a United a zawm khan khawvela 'teenager' manto ber a ni.A debut match ah hattrick siamin Champions League a hattrick siam thei naupang ber record a siam zui!!! English player zinga UCL a goal thun hnem
ber a ni mek.

3. Premier League history a a zawna hattrick siam thei player pali zinga mi a ni a,Premier League Player of the Month hi amah aia dawng tam an la awm lo.

4.Manchester Derby a goal thun hnem ber niin goal 11 a thun tawh a,Premier League history a goals leh assist 10 aia tam a zawna season 5 chhung nei thei awmchhun a ni.Cantona khan season 4 chhung a nei.

5.Kum 2008 khan Premier League match 200 a khel tling tawh a,hetiang ti thei naupang ber a ni.

6.United history a goal thun hnem ber pathumna a ni mek a,Sir Bobby Charlton a record khum turin goal 32 chiah a mamawh tawh.

7.Ram tan goal 38 a thun tawh a,goal thun hnem ber ni turin goal 12 a la mamawh.Competitive match bikah erawh England tana goal thun hnem ber a ni mek.Hetihlai hian Three Lions player zingah amah leh David Beckham te chiah hi red card vawi 2 hmu awmchhun an ni!!!

JIMMY MURPHY YOUNG PLAYER OF THE YEAR AWARD

Manchester United hian kum 1982 atang khan "Young Player of the Year" hi a thlang tan a, kum 1986 atangin "Denzil Haroun Young Player of the Year" tih a ni a,tichuan kum 1989-90 atang khan Sir Matt Busby-a assistant Jimmy Murphy hming chawiin phuah a ni ta a ni.

Lee Martin (1989-90): United ah kum 6 a cham chhungin game 106 a khelsak hman a, 1990 FA Cup final replay a chakna goal thuntu a ni.Kum 1994 ah Celtic lam a pan a hemi hnu hian na taka a inhliam zui avangin a duh angin a inkhel zui tam thei lo. He English left-back hi MUTV tan a thawk thin bawk.

Ryan Giggs(1990-91,1991-92): He Award a zawna dawng hmasa ber a ni a, a chanchin sawi tam vak a ngai awm lo e. Legend diktak a ni.

Paul Scholes ( 1992-93): Fergie's Fledglings era a intan a, a naupan laia a rualpuite zinga a tet bik vang leh asthma a neih avanga enkan hlawh thin Paul Scholes hi vawiinah chuan tunge a nih kan hria e.

Phil Neville ( 1993-94): Football khawvela unau hlawhtling ber zinga mi Neville unaua a naupang zawk "Phil" hi United ah season 11 zet a cham a, defence ah leh midfield a chhawr kawp a ni fo bawk. United chhulchhuak duhawm berte zing a mi a ni.

Terry Cooke ( 1994-95): A debut game ah assist nei mahse first-team ah tum 8 chiah a inlan a,club hrang hrangah loan a a kal kual hnuah kum 1999 khan Man City a zawm. Class of '92 ah chuan a hlawhtling lo pawl tak a ni ngei ang.

Ronnie Wallwork(1995-96):Manchester khaw naupang Wallwork hian United a kum 7 a cham chhungin first-team tan vawi 28 chiah a inlan a.Club hrang hrangah loan a kal kualin kum 2008 ah football a chawlhsan.

John Curtis ( 1996-97): United ah kum 3 chamin defender beiseiawm taka ngaih a ni a. Amaherawhchu kum 2000-ah Blackburn lama hralh a nih hnu lawkah na takin a inhliam a.Football khawvelah a hming a chher zui lo.

Wes Brown ( 1997-98,1998-99): He English defender hian kum 12 mi lek niin United Academy a zawm a.Player beiseiawm tak ni mahse hliamin a tlakbuak fo avangin a nihtur ang a ni pha lo a tih theih awm e.2008 UCL final a Ronaldo goal thun tur a siamsak te kha kan la hre theuh awm e.

Bojan Djordjic(1999-00): He Swedish player hian kum 17 mi lek a nih laiin United a zawm a.First-team tan erawh vawihnih chiah a inlan. A discipline chhiat avangin a talbuai fo a, tunah hian kum 32 mi niin an ram club Vasalund ah contract a la nei.

Alan Tate ( 2000-01): United Reserves team captain hlui a ni a, senior team tan erawh vawikhatmah a inlan lo.Kum 2004 atanga tun thlengin Swansea tan a la khel.

Paul Tierney(2001-02): United senior team tana league game khel phalo bawk a ni a,kum 31 mi niin amateur club Preswitch Heys tan a la khel.

Ben Collett ( 2002-03): 2003 FA Youth Cup final a goal a thun hnu lawkah United Reserves tan khel tura thlan a ni a.Vanduaithlak takin he game ah hian Middlesbrough player Gary Smith chuan na taka tlawhin a ke hmun hnihah a tliak a,a football zinkawng chu tihtawpin a awm ta!! Hemi hnu hian Middlesbrough leh Smith te hi court ah khingin hnehna a chang a, zangnadawmna pound maktaduai 4.5 zet a dawng a ni.

Jonathan Spector(2003-04): He American defender sambuang hian Birmingham City tan a la khel ve mek. United a hmun lailum chang phalo zing a mi a ni.

Giuseppe Rossi ( 2004-05): United Reserves tan game 55-ah goal 44 a thun a, first-team tan game 14 ah goal 4 a thun bawk.Hliamin a tibuai fo na in United atanga a chhuah hnuah striker duhawm ber pawl a ni thei.

Darron Gibson ( 2005-06): He Irish midfielder hi player chhia tihtur ni lo mahse a "talent" hi a limit ve deuh nge ni, first-team ah hmun a chang reilo a,tunah Everton tan a khel mek.

Craig Cathcart (2006-07): A ni pawh hi centre-back inhliam ching tak a ni a, United first-team tan a khel hmanlo. Tunah Blackpool tan a khel mek.

Danny Welbeck ( 2007-08): Player thiam tia sawi tur ni lo mahse a workrate a that avangin manager te duhsak a hlawh ve fo.Tun season tawpah erawh chhuak tur an sawi rik zingah a tel tlat.

Federico Macheda (2008-09): Aston Villa lama goal mawi tak a thun hnuah leh league title la thei tura Sunderland lama a pet goal hnuah kum engemawzat a liam tawh a.He Italian striker-ah hian theihna awm mahse a lailum a chang pha tlat lo.Club hrang hrang pangaah loan in a chhuak tawh a tun season tawpah a mutbu a tel a nih pawhin thilmak a ni tawh lo ang.

Will Keane (2009-10): Kum 21 a upa striker hian first-team tan vawikhat a khel ve tawh a.Tunah QPR lamah loan in a kal mek. A phirpui Michael hi defender a ni thung.

Ryan Tunnicliffe ( 2010-11): Kum kaw mi lek a nih laiin Manchester khuaa pa pakhat chuan "Ka fapa hian Manchester United tan a la khel dawn a ni" tiin £100 a 'bet' a.Tichuan,kum 2012 September khan a fapa Ryan chuan United senior team tan a khel ve a,a pa hian £10000 a dawng ve thung.Tunah erawh Fulham tan a khel tawh.

Mats-Moller Daehli (2011-12): Kum 15 mi lek niin United tan amateur contract a sign a, midfielder beiseiawm taka ngaih a nih laiin kum 2013 nipui lai khan a hnampui Ole Solskjaer a enkawl Molde lam a pan a.An hralhnaah hian an duh hunah United in an lei leh thei ang tih a inziak thung. Solskjaer a hniak chhui zelin tunah hian Cardiff City tan jersey no.29 a ha mek.

Ben Pearson ( 2012-13): Kum 9 a nihin United a zawm der tawh. Paul Scholes a nen an khelhdan a inan avangin khaikhin a ni fo thin. England U-18 tan captain armband a hreng tawh bawk.

James Wilson ( 2013-14): U-18,U-19,U-21 leh senior team tana season khat chhunga goal thun vek thei Wilson hi tun season tawpah a contract a zo dawn a,renew an tum mek nia sawi a ni.Kum 18 a upa, feet 5 leh inchi 11 a sang striker hi eng ang taka tha nge a nih tih chu hunin a la hril ang chu.

TAWI NAWI

*Loan a Birmingham City lama khel mek Italian striker Federico Macheda chuan a chetthat chhunzawm zelin Charlton Athletic 2-1 a an hnehnaah goal 2 thunin Birmingham a zawm hnuah game 2 khelin goal 3 a thunsak tawh a ni.Kan player loan a chhuak dang Wilfried Zaha,Sam Johnstone,Tom Lawrence te pawh an club thar tan an inlan theuh a,Bebe pawhin goal a thun e.

*Juan Mata chuan a club thar Man United chu tun dinhmunah an hriam tawk loa a ngaih thu a sawi.Spanish playmaker Mata chuan "Chance kan ngah ang hu in goal kan thun thei lo a,chuvang chuan kan shooting accuracy ah hmasawn kan ngai a ni.Kan vanduai ani tih hi chhuanlama hman reng ka duh ve lo" a ti bawk.

*Hetihlai hian Man United captain hlui leh Hull City manager ni mek Steve Bruce chuan League game vawi 25 a vawi 12 chiah a naute chakpui thei David Moyes a rintawk thu a sawi a."Kan zavai hian Sir Alex a thlaktu nih hi a harsa dawn tih kan hria a,Davi(Moyes) pawh hian harsa a ti a ni.Nimahsela hun pe ula,a experience nen engkim hi a la tha vek dawn a,ka chiang tawk a ni" a ti.

Top 4 : Manchester Derby Kan Hriatreng Tur

Manchester khawpuiah unau ni si lovin kan piang dun a, midum leh mingo ai pawhin tunah chuan kan danglam tawh!

Aw le, tun tumah hian Manchester derby an khelh tawh zawng zawng a, chanchin chhinchhiahtlak tak tak palite ka rawn ziak lang dawn a ni. Ngun takin I lo chhiar dawn nia : -

1.Dennis Law-a’n United a khêng tla :

1973-74 season khan Man City chuan Old Trafford tlawhin, mual neitu zawk 0-1 in an tlawm a, hei hian Man United chu English division hniam lamah a theh thlak phah a ni.

He inkhel a goal awmchhun hi United chhandamtu ni thin, Dennis Law-a’n minit 81-naa a ke artui hnunglama a khen luh a ni.

He goal hian Law-a hi a tihlim hran lova, ama goal thun avanga a club hlui, United an tla a hmuh hian, lungngaiin a kun ngawih ngawih a ni.

2. Roy Keane-a’n Haaland-a hun a tihtawpsak :

2001 kum khan Old Trafford-ah bawk an intum a, United captain rorum, Roy Keane chuan Manchester derby chu a phuba lakna’n a lo hmang hmiah!

Alflnge Haaland hian kum thum kal ta khan, Roy Keane hi a ti na a, hei hi United midfielder hian a la hre rân mai. Hemi tuma Roy Keane-a’n Haaland-a laka phuba a lak tum hian, red card hmu mahse a inchhir lo chiang khawp mai.

Haaland hi inkhel zui thei mai mahse, he hliam vang hian inzaipui vawi tam a tawh phah a, a football career a tichhe ta a ni.

Keane hian a lehkhabuah hemi chungchang hi heti hian a ziak: “Kha hun kha ka nghak rei tawk tawh a ni. Ka tawk na hle tih ka hria a, kan bulah khan football kha a awm ve chuan ka hria...” a ti.

3. Michael Owen-a goal ropui :

September 2009 a ni a, City fan-te chu player tha leina’n £100mtd lai an sen avangin an inringtawk hle a ni.

Minit 90 leh hunpekbelh an khelh zawh hma kha chuan, City fan-te chuan premier league history-a game ropui berah chak lo zawk an ni dawn, tih an hre bik hauh lo vang le! Carlos Tevez-a’n United atanga City a zawm hlim lai boruak vel a ni bawk a, boruak a sang khawp mai.

Minit 90-naah Craig Bellamy chuan 3-3 nih rualpui turin City tan goal a rawn thun a; mahse, minit 90-naa goal lut hi a tawpna a la ni lo! Substitution thuthleng  atanga lo lut, Newcastle United duh loh hnu, Michael Owen chuan hun pek belhah Red Devil fan-te tana goal hmuh nuam ber ni turin, chakna goal mawi mangkhengin a rawn ti lut a, he goal hi kum tam tak titi a tling tawh ang.

4. Rooney-a goal ropui :

February 2011 khan Manchester derby chuan kum 20 chhunga Premier league goal ropui ber min hmuhtir!

Luis Nani chuan a kangin ball a vawrh thla a, Micah Richards leh Vincent Kompany te inkara awm, Wayney Rooney chuan ball a la thla hman tawh lo a ni, tih hriain amah chu boruakah sang taka invawrh kangin ball kang lai chu na takin a pet/bin (bicycle kick) a, Joe Hart-a tan man hman rual a ni lo.

He goal hi Television-in inkhel chanchin a chhuah theih chhung chu, kan tu leh fate thlengin an la hlimpui ngei ang.

MMUF Review Manchester United 0 - 1 Newcastle United 07/12/2013

Manchester United 0 - 1 Newcastle United
Yohann Cabaye 61'

by Mykee Rokhum

Attacking Line hmawr bil kan tuar a nih ber kha. Kan khelhpui te an solid in an in remkhawm tha ropui mai si a, organised takin an khel a, thriah harsa kan ti a nih kha. Tin, kan player te kha mahni inringtawk lo lutukin an khel niin a lang. Manager leh anmahni, player te ngei thiamloh ve ve liau liau a ni ang.

GOALKEEPER: DAVID de GEA a khel pangngai thawkhat e. Cabaye goal thun ah tihtheih vak a nei nganglo anih kha. Debuchy shot a save kha a tha hle bawk.

DEFENCE: RAFAEL a khel pangngai a tihtheih. Goal veng zawngin a talbuai em em lo a, goal nawr lam puih a tum nasa a, mahse a langsar vak theilo a ni. EVRA a khel chhia. Cabaye goal ah mawh a phur a tihtheih a, tin, a awmna flank kha a hlauhthawnawm thei khawp mai. Goal nawr ah pawh a thawhhlawk theilo a, goal ban erawh a tauh per a ni. EVANS a khel pangngai. Tihsual a nei lemlo nain, tunhnaia a khelh angin a kheltha tawklo. Tlarhnung tiphui turin a bei nasa tawk lo a, tin, a ti "hni hne" deuh mah mah angin a khel kha a lang. VIDIC a khel pangngai bawk e. Lehlam goal nawrtute tharum leh pace avang khan Evans nen khan an buai zeuh zeuh a ni.

TAWI NAWI

GOALKEEPER AMOS CARLISLE LAMAH

 Man United senior team tana vawi vawi 7 khel ve tawh,England U-21 international hlui Ben Amos chuan thlakhat chhung atan loan in League One club Carlisle United a zawm.Carlisle hian an first-choice kepper Mark Gillespie inhliam vangin a thlaknan kum 23 a upa Amos hi an lalut a ni.

UNITED-AH 'NEW MESSI'?

British media te tarlan danin Scotland club Dundee United a khel mek,kum 17 leka upa Ryan Gauld chu United in an umzui ngawrh hle.Gauld hi attacking midfielder niin ft.5'5 a sang a ni a,kar hmasa mai khan Scotland U-21 tan a debut game a khel a ni.Tunah hian Europe club lian tam tak,a bikin Real madrid leh Liverpool ten lakluh tumin an bei nasa leh tawh hle a,United pawhin Gauld-a umzui turin first-team coach Jimmy Lumsden an tir niin an sawi.