DAVID BECKHAM : ‘BETTER LATE THAN EARLY’

Zinadine Zidane kan hria; Ronaldo Luiz nazario de Lima pawh kan hria; Thiery Henry pawh kan hre vek. Inkelh an thiam a, inkhelh ngaina tu te tan chuan ngaihsan loh rual an nilo, khawvela chawimawina sang ber ber leh hlu ber ber an dawng tawh tlat alawm!!  Mahse, Football khawvel 90’s chho vela sawi nghing tu David Beckham erawh a bangah chawimawina sang ber ber leh ropui tak tak te intar phe chuai ve lo mahse a chanchin hi kan sawi bang thei mawlh lo. Kan ‘nghilh’ thei mawlh lo a ni.

MIFING TEN RIMTUI AN HLAN VE LOH LAL THAR LO PIANG A CHU!! :

May ni 2, 1975 khan Whipps Cross University Hospital, Leytonstone, London, England ah Khawvel mipa te zinga sakhming mawi ber ni turin ‘ David Robert Joseph Beckham’ hi alo piang a.
A pa hi David Edward Alan Ted Beckham niin ‘Kitchen Fitter’ a ni a, tin, a nu hi Sandra Georgina niin ‘ hair dresser’ a ni bawk. Beckham a nu leh pa te hi Manchester United fans ruh tak niin an hman phawt chuan Old Trafford, Manchester ah inkhel en turin London atangin an kal vang vang thin a ni. A nu leh a pa te atang daih tawh hian ‘a sen’ hmangaihna hian zung alo kaih tawh a ni. ‘Football’ in a cheng bawr a vawnna inchhunga seilian a nih avang hian Beckham hian football hi a ngainat phah hle a ni.

“SIKUL KA KAL PEIHLO, KA INKHEL DUH ZOK” :

                Mizo naupang inkhelh ngaina tute ang bawkin Beckham pawh hian inkhelh hi a atchilh hle a, kum 1991 khan kum 16 mi lek a nih laiin thiamna run sang zawk bel duh lovin a hmangaih em em ‘football’ tan a  nun pum hlan in a inpumpek ta a ni. Mahse, mi taima leh tumruh tak a nih avangin duhthlanna a siam suallo chiang hle .Kum 2007 a interview an neih na ah chuan Beckham chuan a naupan lai hun sawiin, “ Sikul ka kal laiin kan zirtirtu pakhat chuan ‘enge I upat hunah nih I duh?’ tiin min zawt a, kei chuan, ‘Fooballer nih ka duh’ kati a. Ani chuan, ‘I upat huna I hna thawh tur alawm ka zawh che??’ an tih leh chuan, ‘chu chauh chu alawm ka duh’ tiin ka ka chhang a mak ati hle a ni.” tiin a sawi.

MANCHESTER UNITED AH :

             1991 vek hian ‘Manchester United Youth Training Scheme’  zawm ve in a talent neihthat zia hailan a nih hnuin Tottenham Hotspurs ah a trail ve a, mahse vanduaithlak takin a tlinglo hlauh a ni. Beckham hian Manchester United Youth team zawmin 1992 a FA YOUTH CUP final second leg ah Gary & Phil Neville, Paul Scholes, Nickey Butt te nen khel hovin Crystal Palace lamah goal a thun ve nghe nghe a ni. Hemi tuma United youth team te hi ‘ Greatest generation of Manchester United’ anti hial a ni.

Hemi kum vek hian Leaque Cup a Brighton nen an inkhelh tumin substitute ah awmin Manchester United senior team tan a inlan ve a ni. Hemi hnu reilo teah hian Sir.Alex Ferguson chuan ‘professional contract’ a ziahpui nghe nghe a ni.  1993 ah Youth Cup ah Manchester United champion pui leh in ,1994 ah reserve team leaque ah a champion pui leh bawk a ni.

          Kum 1994-95 season khan Sir.Alex chuan first team experience a neih theih nan tiin ‘Preston North End’ ah loan in a kaltir a, hetah hian a che tha nek ni tur a ni, 2 April,1995 a Leeds United nen a an inkhelh tum in senior team ah a rawn inlan leh a ni. 1994-95 season chuan first team players 3 lai an chhuah tak avangin Alex-a chuan players thar lei lovin tleirawl rual a chhawr a, hei hi Media lam chuan an sawisel nasa hle a nih kha. Mahse, hemi tum hian Manchester united chuan ‘Premiership’ leh ‘FA Cup’ la in, Beckham hi players thawhhlawk ber te zinga mi a ni nghe nghe a ni. 1996 alo in her meuh chuan England captain te zinga a hming dai ngai leh tawhlo tur Captain David Beckham-a hming chu England  National team squad ah a chuang ve ta a ni.

Manchester United a a khelh dan chanchin leh a chawimawina dawn leh cup a lakpui te chu sawi vek seng an nilova, mahse  chung zinga kan sawi loh theihloh chu 1998-99 a ‘Treble Cup’ an lak kha a ni. Hemi season hian Manchester chuan Premier Leaque, FA Cup leh UEFA Champions Leaque an la a ni. Hemi tum hi Beckham hi player pawimawh ber te zinga mi niin mipui te’n an fak ning theilo a ni. Chanchinbu David Beckham a thlalak chuan ve loh na te chu hralhna an hmu zo meuh tawh lova, commentator ten tawng an inchuh ta rap rap mai! ‘European Player of the Year’ a nilo; ‘FIFA Player of the Year’ a ni hek lo. Mahse, ESPN, Sky Sports leh StarSports, tial hnehtu ber a ni thung si! Manchester United show room ah ‘Jersey No.7’ a inkhai rei hman tawh lo! England khawpui zawng zawng ah te chuan a thlalak a phe chuai a, tleirawl/tlangval hair style ang nei ve lo chu nula hovin an hmu tai hlei thei ta tlat lo!! Khatih hun lai kha ka ngaihtuah let hian ‘Lionel Messi’ leh ‘Christiano Ronaldo’ te hian ‘an khum a ni’ ti thin mahse ka pawm theilo. Tin, kum 1999 a Manchester United UCL a an champion tum pawh khan player pawimawh ber te zinga mi a ni leh a ni.

SAWM THAH NIAH PAWH VAWIKHAT LUNGNGAIH CHU A AWM CHAWK :

Kum zabi thar alo in her chhuah meuh chuan Aamir Khan-a ten ‘Dekho 2000’ chet hit pui viau mahse, Manchester United ropui taka khawvel ngam pui tu David Beckham tan erawh sawiselna leh sawichhiatna te nasa takin a rawn inlar thung a.

1999 World Club Championship a  Necaxa nen an inkhel tum a a red card hmuh dan mawi vaklo te chuan sawizui a hlawh hle a, chanchinbu mite chuan a nupui Victoria Beckham chuan Beckham chu kawng diklo lamah a hruai niah puhin Manchester United tan a hralh mai a that thu te an ziak chuai chuai mai a. Mahse, Sir.Alex chuan Beckham chu chhanin Juventus lama kal tur anga an sawi lai pawh chuan a chelh lui hram hram a. Mahse, kum 2000 a rawn inher chhuah meuh chuan Beckham a leh an boss Alex a te inkar ah chuan sawihleihtheihloh khawpa thuk daidangtu khuarkhurum a rawn awm ta a. Heihi Manchester United a a awm chhan football aia hmingthanna leh ropuina ah Alex an a puh vang a ni. 

Nikhat chu a fapa Brooklyn damlohna avangin Beckham chuan training chawlh a dil a, damlohna leh chhungkaw thil pawimawh te a nih vangin Alex-a chuan a dilna chu lo pawmsakin Beckham chu a fapa enkawl tur chuan a awl ta a. Mahse chumi zan chuan a nupui Victoria chu London Fashion Week ah bawih angreng deuha a tei Alex-a chuan a hmu leh ta si a, chu chuan putar thin a ti sa kher mai!! Alex-a chuan, “Victoria-i’n a fpa damlo pawh ngaihsak lova Fashion week a a inthehparh hman a nih chuan Beckham pawh hian training a zawm hmen ve tur a ni,” tiin Beckham chu pawisa, player in an chawi theih sang ber (kar 2 hlawh – £50,000 ) chawitir in an hmelma hlun Leeds United nen game pawimawh tak an khelh tumin a kheltir duhlo bawk a ni.

NI ROPUI A LO THLENG LEH TA! :

David Beckham hian Manchester United a a awmlai hian Premiership title a lakpui mawlh mawlh ti ila kan sawi sual awm love. 1999-2000 leh 2000-01 season a BPL title United in an lak tum pawh khan Beckham hi player pawimawh ber te zing a mi a ni. 2000-01 season phei hi chu Manchester United a a awm chhunga a season hman ropui ber tum a tih theih. Leaque khelh 28 ah goal 11 thun in, a pumpuiin competition hrang hrangah khelh 42 ah inlan in goal 16 lai a thun nghe nghe a ni. Beckham hian tun hmaa a hmingchhiatna zawng zawng te chu a khuh chiang hle a ni.

HLIAMPUI TUARIN A RUM VE TA!! :

April ni 10, 2002 zanah Manchester United leh Deportive La Coruna te chuan UCL match khelin he match hi Beckham atan chuan theihnghilh theih a ni tawh lo. He inkhel ah hian Beckham chuan a second metatarsal ruh ti tliakin khawvela ke na lar ber a tih theih hial. Hemi tuma Beckham a tina tu Argentine Aldo Duscher hian a tihpalh nilovin a tum reng vanga tilui niin British Media te chuan an sawi nghe nghe a ni. He inhliamna hian Beckham-a tan harsatna tam tak siam sak bawk mahse Manchester United a a pawimawh zia tilang tu a ni thung a ni. Hemi season hian Manchester United chuan Premier Leaque titile la zo lovin European cup ah pawh Bayern Leverkusen in an hnawtchhuak nghe nghe a ni. Beckham hian hliam a tawrh lai pawh hian ala hlawh hnem hle a, khatih hun laia khawvel footballer te zinga hlawh hnem ber a ni nghe nghe a ni.

HUN HARSA A HMACHHAWN LEH TA!! :  

Hliam in hun rei tak a tlakbuak avangin Beckham hian United a a hmun ngai awh lawk thei lovin Ole Gunnar Soskjaer chu a hmun ruak awmhkhat tu ah Alex-a chuan a hmang fo ta mai a. Hei hian Alex a leh an inkara khi awm chu a zauh hret hret zel a. February 15, 2003 a Arsenal FA Cup a an hnehloh tum in dressing room-ah Alex-a chuan chhuata ball boot awm chu pet sawk in Beckham mit ko ah tak a han fuh a, thui ngai hial in a kak ta a. Beckham hian khawih let lemlo mahse a mit a hliam awm chu khawlaiah lenpuiin mipui leh chanchinbu mite hmuh ngei turin a pholang ta a. Hemi tuma thil thleng hi United fans te tan chuan a lungchhiatthlak hle in a rinawm. Beckham nge chhuak ang Alex??? tih chu Khawvel football fans te titi lian ber chho ta a.

MADRID KHAWPUI LAM PANIN A PEM CHHUAK TA! :

Kum 2003 nipui transfer alo inher chhuah meuh chuan Beckham chuan dawrtu a ngah ta kher mai. FC Barcelona zawm tur angin thu thang mahse, team ropui dinthar leh tum Real Madrid chuan £25 ml in an lei chhuak ta a ni. Real Madrid a a season hmasaber ah hian Copa Del Rey ah runners-up nih puiin vanduaithlak takin Champions leaque nomawi pawh a chawipui thei ta lo a ni. Mahse, vanneihthlak takin Spanish Super Cup chu a lakpui thei hram a ni. 2005-06 season ah pawh Real Madrid chu Spanish Premier leaque ah runners-up bawk nih puiin UCL ah pawh round of 16 ah an tla nghe nghe a ni. 2006-07 season ah Real chuan President thar hnuaiah an ngaih em em Spanish leaque title chu an la leh a, hemi tum hian Beckham hian a thawh hlawk hle a ni.

Beckham hian Real Madrid a a cham chhung hian cup ropui tak tak lapui lo mahse a hming a chher chhunzam zel a, Basketball player ‘Michael Jordan’ a jersey no. 23 chu khawvela no mawi ber te zinga mi ni turin a hmingthanpui nghe nghe a ni.

Forbes magazine in a tarlan dan chuan Real hian Beckham vang hian sum leh pai lamah hlawkna an tel nasa hle a, US$600 million lai an bungraw hralhna atangin an tel niin a tarlang. Hei hian Beckham a mipuiin in an ngainat zia a tilang chiang hle awm e.

LOS ANGELES GALAXY LAMAH :

July 2007 ah Beckham chu  LA Galaxy Home Depot Centre ah mipui 5,000 chuang leh Accredited Media 700 lai hmaah lawmluh a ni a, US ah pawh boruak ala ngah kher mai. Beckham hian khelmual a rah hma hauhin a jersey chu fans tam takin a hak daihin an lo hak khalh hman der tawh a ni. Beckham hian Galaxy tana a game hmasa ber hi Chelsea FC nen friendly match an khelh tumin a khel a, 78^th minutes ah a rawn lut a ni. A vanglai a pel deuh hret tawh bawk nen Galaxy ah hian sawi deuh chiam tham in a khel ropui hran lova mahse fans te inkhelh en ti chak tu ber chu ala reng a ni. Beckham hian LA Galaxy ah hian kum tin $6.5 million a hlawh a ni.

MILAN LAMAH LOAN IN :

Beckham hian England national team tan a khelh leh a chak thu sawiin January 2009 khan he a beiseina ti nung thar leh tur hian upa te tana khawvel football kawngkhar hawnsak tu AC Milan ah loan a kal tir a ni a, Milan ah hian Christian Vieri a jersey no hlui ‘32’ a ha nghe nghe a ni. Beckham hian Milan ah hian a thiamthil ala theihnghilh loh zia a lantir leh a ni ber a, a game hmasa Khelh 4 ah goal 2 lai khungin assist a nual bawk a, LA Galaxy fans ten an awt leh ta kher mai. Italian media lam chuan Beckham chu Milan a cham hlen tawh dawn ni ten an chhuah a, amah Beckham a ngei pawh in Milan a a khelh chuan England squad ah tel thiehna chance a pe thei dawn tih hria in Milan a cham zui hi a duhthu hi a sawi lang ve a ni. Mahse, LA Galaxy lam hian Golden Ball hi chhuahtir mai chu an lo phal bik awzawng lova a man ah $10-15 million lai an lo chhiar in hei hian Beckham a neih hlen tuma Milan beiseina chu a ti tawp ta a ni.

LA GALAXY LAMAH A KRI LEH TA :  

Beckham Galaxy a a kir lrh nhu hian fans ho chuan a chunga an lungawiloh thu leh an huat zia an lo tilang chiam mai a, poster ah ‘Go home fraud’ tih te leh ‘Part time player’ tih te an lo tar hial a ni. Mahse, he season hian Beckham hian a club hi a chetthatpui hle a,  Western Conference final  (2009) a an champion theih nan a player thawhhlawk ber te zing a mi a ni nghe nghe a ni.

MILAN AH BAWK LOAN IN A KAL LEH :

January 2010 ah a vawi hnih nan Beckham chuan Milan kawr ha leh in February 16 ah Manchester United a chhuahsan hnua a hmasa ber na atan San Siro ah Manchester United alo milhual nghe nghe a ni. He inkhel ah hian Milan chu 3-2 in an tlawm nghe nghe a ni. Milan a a vawi hnih na atan a a kir leh hian a ke in kum tam fe alo rah tawh loh Old Trafford a rah leh phah ta a, hei hi atan chuan thil lawmawm tak a ni ngei in a rinawm. He inkhel ah hian Beckham hi a khel chhelo hle a, mahse inkhelh a chungnung zawk Manchester United chu 4-0 in an chak leh ta a ni. Inkhel a zo chiah tih in Beckham chu green and gold scarf  (he scarf hi anti-Glazer symbol a fans ten an hman a ni)lai hmuh a ni a, heihi Manchester United fans pakhat in Glazer chhungkaw dodal nan a a pek a ni nghe nghe a ni.

        Beckham hi September 11, 2010 ah LA Galaxy ah bawk kir leh in tun thlengin ala awm a ni.

KHELMUAL PAWN LAM AH :

Beckham hi kum 2005 ah UNICEF Goodwill ambassador atan ruat a ni a, naupang te hmasawnna atana theihtawp chhuah thin mi a ni. Tin, Beckham hi Olympic Games 2012 London in a thel theih nana theihtawp lo chhuah tu a ni bawk a ni. Beckham hian Los Angeles ah leh London ah te Football academy neiin khawvel a football academy hmingthang ber te zing a mi a ni nghe nghe. A nupui Victoria Beckham chuan fapa 3 leh fanu 1 hrin sakin an hmingah Brooklyn Joseph Beckham (1999), Romeo James Beckham (2002), Cruz David Beckham (2005) leh Harper Seven Beckham (2011) a sa a ni. Beckham hian a ban veilam ah Hindi tawng ngei in tattoo a chhu kalh mai a, he tattoo awmzia hi ‘Vihctoria’ tih na a ni. A taksa pum deuh tho ah tattoos neiin  a vaiin tunah tattoos 20 lai a nei a ni. Heng a bana tattoos te khuh nan hian Beckham hian inkhelh na ah kawr bantluan deuh hlir a ha thin a ni.

Beckham hian chanchin ziah sen loh ngaihnawm tak tak a nei a, heng tehi avai maia ziah chhuah vek chakawm hle mahse tun tum atan chuan hemi chin ah hian kan lo duhtawk hrih phawt mai a nge. Tin, Facebook a ‘Beckham ke dinglam’ tih hming in vuah ka hmuh vanga he post hi siam ka ni tih min lo hriatsak bawk dawn nia(Amah kha Zofooty ah hian a awm ve a nih chuan lo in report nghe nghe se a lawmawm khop ang). Beckham hian chanchin mawilo tak tak nei ve thin bawk mahse footballer te zingah chuan entawntlak ber te zinga mi a niin ka hria.