UNSUNG HEROES

A thupui hi Mizo tawnga dah ka tum ngial a,ka thiamnain a tlin tlat lo.Football khawvelah hian player chi hrang hrang an awm a,naupangte an nih laia lar,ropui taka chawl zui ta an awm a,upat hnua lar te,beiseiawm taka ngaih zuzi chho ta pawh sawi tur an awm nual awm e.Goal khung thei te,thiamthil(talent) danglam bik neite hian fak leh hriatreng an hlawh fo a,chutihlaiin an hunlaia player tha leh tangkai tak ni si,hriat zui leh fak hlawh loh player an awm ve nual a,chung mite chu “unsung heroes” kan tihte hi an ni.Ziakmi hrang hrangin Manchester United Unsung Heroes nia an chhalte hi an chanchin tlangpui tarlang ang aw-

Ronny Johnsen- Pa lian,huaisen,tough,central midfield ah pawh chhawrtlak nia an sawi Norwegian defender Jean Ronny Johnsen hi kum 1969 June ni 10 khan a lo piang a.Kum 1996 khan Besiktas atangain pound maktaduai 1.2 in Man United a zawm a.United tan League title 4,FA Cup 1,FA Charity Shield,Intercontinental Cup leh Champions League title a hlawhchhuak a.1998/99 season a treble champion kan nih theihna tura player tangkai tak niin semi-final away game-a Juventus kan hnehna kha a career-a a khelh that ber ni hiala chhal a ni a,final ah Jaap Stam nen inkawpin minute 90 a khel bawk.Inhliamin a tlakbuak fo avang leh players tha dang an lo chhuak ve zel nen,2001/02 season zawhah free transfer in Aston Villa a zawm a,hemi hnu hian Newcastle United leh an ram club lar Valeranga ah te khel lehin kum 2008 khan a ballboot a khai ta a ni.United tan hian game 99 khel hmanin goal 8 a khung.

Denis Irwin- Kum 1965 October ni 31 a piang Denis Joseph Irwin hi Irish footballer zinga hriat hlawh ber pawl a ni awm e.English club lar Leeds United ah bul tanin Oldham Athletic a zawm leh a,tichuan Man United history a defender ropui berte zing ami ni turin kum 1990 khan pound 625,000 lekin Old Trafford-ah a lut a.United a kum 12 a cham chhungin a tel lo in United hian game 529 an khel ngam lo!!! Paul Parker,Steve Bruce leh Gary Pallister nen defence line-ah inkawpin kum 1990 chhoa English football a Man United an vawk lal len theihna chhan ber pakhat ni mahse a thawhhlawk ang hu chuan fakna a dawng tam lo hle. EPL vawi 7,FA Cup vawi 3,League Cup vawi 1,Cup Winners Cup vawi 1 leh Champions League te chawiin Premier League Team of the Decade(1992/93-2001/02) ah a langpha a,free-kick leh penalty specialist a ni bawk.Kum 2000/01 season tawp niah Charlton Athletic nen inkhelin captain atan hman a ni a,heihi United tana a game hnuhnung ber a ni zui ta a ni.Hemi hnu hian Wolverhampton Wanderers zawmin kum 2004 khan professional football a chawlhsan.Tunah hian MUTV ah presenter/pundit angin a thawk mek.

Jesper Blomquist- Swedish winger sambuang theng thung,Parma leh AC Milan vela lo khelkual tawh Lars Jesper Blomquist hi kum 1974 February ni 5 khan a lo piang a,kum 1996 khan pund maktaduai 4.4 in Parma atangin United a zawm a.United-a a cham chhungin League,FA Cup leh Champions League ah vawi 1 theuh a champion a,1999 UCL final-ah phei chuan a first XI-ah a telpha hial a,heta tang ringawt pawh hian player tha a nihzia chu a chiang mai awm e.Hmabak nei eng taka ngaih ni mahse inhliamna in a umzui reng a,season hnih tawp inkhel thei lo in a inhliam a,heitihlai pawh hian media lamah MUTV tan a inhmang reng tho a ni.United a season thum a cham chhungin game 38 a khelhsak hman a,kum 2001 khan Everton panin a chhuak.

Henning Berg- Kum 1969 September ni 1 a piang,Norwegian defender hlui Henning Berg hi footballer zinga English Premier League-a team pahnih champion pui thei hmasa ber a ni!!! An ram club Valerenga leh Lillestrom ah te a khelh hnuin kum 1993 khan Blackburn Rovers a zawm a.Blackburn vanglai nang chhoin 1994/95 season-a league title latute zingah a tel.Tichuan,kum 1997 ah pound maktaduai 5 in Man United a zawm a,a hunlaia British club in defender a lei manto ber a ni.Old Trafford-a a cham chhungin EPL vawi 2,FA Cup,UCL,FA Charity Shield leh Intercontinental Cup te la in Dutch defender tha Jaap Stam a luh hnuah hmun a chang tlem tial tial a,kum 2000 khan a club hlui Blackburn zawm lehin kum 2004 khan Rangers atangin professional football a chawlhsan.

Nicky Butt- Manchester United Reserve Team Coach ni mek,England midfielder hlui Nicholas “Nicky” Butt hi kum 1975 January ni 21 khan Manchester-ah a lo piang a.United Youth Academy chhuak niin “Class of 92” zingami a ni.Kum 1992/93 season ah United tan khel tanin Paul Ince a chhuah hnu phei chuan Roy Keane nen inkawpin player tangkai tak ani chho a,1997/98 season a Keane a inhliam phei chuan PFA Team of the Year a telpha khawpin a khel tha a,kum 1999 Champions League Final ah pawh minute 90 a khel nghe nghe.A thianpa Paul Scholes a lo awm mai mai biklo nen,duh angin first team football a changpha ta lo a,kum 2004 khan Newcastle panin kum 2011 khan football a chawlhsan.United tan Premier League vawi 6,FA Cup vawi 3,FA Community Shield vawi 4,Champions League leh Intercontinental Cup te a chawi.

Heng mite bakah hian Asian zinga Champions League a champion hmasa ber,goal pawimawh khung thei em em mai Park Ji-Sung te,South African utility player Quinton Fortune te,Irish player tangkai John O’Shea te,Scottish forward Brian McClair te leh tuna Michael Carrick,Jonny Evans te hi an huangah kan khung tel thei awm e.

March 25,2012