Khawvel huap player tha nia kan sawi thinte hi a tuldan a zira duhthlanna siam thiamte an ni thin. Mahnia tih goal theih reng nia lang pawh, amah aia rem zawk an awm chuan a pe mai thin a, mahnia tih hun nia a hriat chuan harsa chung chung pawhin a keng tlang mai thin.
Tuna ka rawn tarlan turte hi kum 2007 hnulama Premier league-a assist ngah ber berte an ni :
10. Antonio Valencia (34) :
Antonio Valencia hi Real Madrid hnena Christiano Ronaldo an hralh hnuin Manchester United chuan Wigan Athletic atangin kum 2009 khan an leichhuak a ni.
Valencia hian United a zawm tirh phat atangin boruak a nghah nghal hle a, tharum a ngah a, a tlan chak em em bawk a ni. 2011-12 season khan a khel tha chungchuang hle a, United jersey nambar roh ber No. 7 an haktir nghe nghe a nih kha. Season liam taah erawh a khel tha lo hle a, tun season-ah erawh beisei a sang hle a ni.
9. James Milner (36) :
Milner hi player stylish tak a nih loh vanga a phu tawk fakna dawng tlem tak a ni. Aston Villa-ah a vanglai a hmang a, Aston Villa innghahna tak meuh meuh a ni. Mahse, Etihad-a a pem hnuah erawh a boruak a dai deuh a ni.
8. Ryan Giggs (37) :
Kum 2007 khan player upa pawl a ni tawh a, mahse, ‘tar zeia’ hian pariatna a la hauh hram a ni. Giggs hian tunhma pha tawh lo mahse, a khelhna hmun apiangah a tha em em zel a, amaha ‘class’ awm hi zahawm tham an ni.
7. Frank Lampard (39) :
Premier league-a midfielder tha ber pawl, Frank Lampard hian a hun hnuhnung hmang mek mahse, Chelsea goal thuntu ropui berte zinga mi a ni. Goal thun mai ni lo, mahni pawlpuite tih goal tura siamsaktu ropui tak a ni bawk.
6. Steven Gerrard (40) :
Kum 2007 hmalam kum kha chhiar tel ni ilang chuan he Captain Fantastic-a hi nambar hmasa lamah a lang ngei ang le. Premier league title la chawi lo mahse, a club dinhmun vawnghim tura a thawhrah hi theihnghilhsak chi a ni lo.
5. Luis Nani (43) :
He Portuguese winger hian Moyes-a vang liau liauvin hmanni lawk khan Manchester United-ah contract thar a ziah belh a nih kha. Hun rei tak ‘hnawl’ ni tawh mahse, a assist neih zah en hian a khelh that lai a nih phawt chuan premier league winger tha ber pawl a la nihzia a lang chiang hlein ka hria.
4. Robin Van persie (44) :
Robin Van persie hi season hnih chhung na na na chu premier league striker tha ber a ni. Mahse, striker ni chungin kum 7 chhunga assist ngah ber palina a ni. A hun tir lamah hliamin a zinkawng tibuai nawk nawk mahse, tunah erawh kum 30 mi nichungin Manchester United leh Holland innghahna a ni.
3. Wayne Rooney (46) :
Tunah chuan engvangin nge David Moyes-a khan Rooney hi hum tum tang tang nge a nih, tih chu I hrethiam tawh maiin ka hria. Ball pet a thiam em avangin, Sir Alex-a chuan season liam ta khan midfielder angin hun rei tak a chhawr a nih kha.
2. Ashley young (48) :
Pahnihnaa Ashley Young sa lang nawlh mai hi mi tam tak chuan mak inti mai thei. Mahse, set-piece a hlauhawm em em leh a sir kil atanga ball tha tak tak rawn vawrh lut thin tan chuan he hmun hi a hmun tur dik tak a ni.
1.Cesc Fabregas (49) :
Kum 2011 daih khan premier league a chhuahsan tawh a, mahse, 2013 thlengin assist ngah ber a la ni. Tunah chuan engvangin nge Manchester United khan he Spanish midfielder hi lak tuma an veh an veh thin, tih chu I hrethiam tawh maiin ka ring. A record hi Ashley Young leh Wayne Rooney te hian an hnaih vet vet hle a, tun season la la hian an khum ngeiin a rinawm.
Top 10-a kan player paruk an awm thei hi a lawmawm khawp mai. Team tha kan nihzia a ti langchiang hlein ka hria.
No comments:
Post a Comment