“UCL-ah Kan Champion Thei.” - Vidic

Manchester United captain, Nemanja Vidic chuan Manchester chu tun season-ah UEFA Champions league champion an nih theih thu a sawi. Amaherawhchu, hemi thleng tur hian nikum lama lo phatsan tawhtu ‘Vanneihna’ chuan a tanpui ve deuh hlek chu a ngaih thu a sawi.


Red Devils hian David Moyes-a hnuaiah bung thar an kai mek a, an hmelma kumhlun Manchester City leh Chelsea lakah an premier league tilte an hum zo angem, tih chu zawhna lian tak a ni.
Nimahsela, United captain chuan United chu an premier league title hum mai bakah UCL trophy pawh chawi tura a tawp rak thlenga bei thei an nih thu a sawi.


TalkSPORT-in an kawmnaah Vidic chuan, “Hei hi thil awlsam a ni lo. Khawvela club zawng zawng hian, ‘UCL-ah kan champion duh,’ an ti vek thei. Mahse, keini chuan ‘tum’ kan nei a, chuvangin alawm nasa taka kan inbuatsaih reng ni. A tawp rak thlengin kan kal thei tih ka hria a, mahse chumi thleng thei tur chuan vanneihnain min puih ve det chu a ngai ang,” a ti.

Vidic chuan 2012-a Chelsea-in UCL an lak chungchang kha sawiin: “Nikum kum leh khan Chelsea khan UCL title kha an lakin ring bik em? Khatih lai khan Barcelona kha an tha a, kum thum chhung deuhthawm trophy an hui deuh vek a ni. Mahse, nikumah Bayern Munich an rawn lang ve ta a...

“Chuvangin, inkhel chu chumi chu an champion ang, tih theih a ni lo. He club(Man Utd)-ah hian kum riat lai ka awm tawh a, final vawi thum, semi-final vawi khat leh quarter-final vawi hnih lai ka lo khel ve tawh a ni. Chumi awmzia chu, United hi englai pawhin a thleng sang pawl kan ni ve ziah, tih hi a ni. Tun tumah pawh hian kan tih thin ang kha kan tih leh ngei ka beisei a ni.

“Nikum khan vanneihnain min kiansan avangin Real Madrid-in quarter-final kan lut tur chu min paihthla a, mahse, tun tumah erawh enge thleng dawn, tih tuma’n kan sawi thei lo,” a ti.

Hetih lai hian, United boss ber hian vawi khatmah Champions league game ala hmachhawn lova, hei vang hian mi tam tak rin a kai lo hle a ni. Mahse, Vidic erawhin chu chu an harsatna a nih loh thu a sawi.

“Ka hriat dan chuan football chu khawii hmunah pawh a inang vek a ni. Moyes hian kum 10 chuang Everton a lo enkawl tawh a; club ropui tak tak – Chelsea, Arsenal, Liverpool, Manchester City leh Manchester United te kumtin a lo hmachhawn tawh thin a ni. Chumi awmzia chu, team lian hmachhawn ngai lo a ni bik lo tihna a ni. Tunah phei chuan United-ah player tha tak tak a enkawl tawh a, chuvangin, UCL-ah hian a sang ber thlengin min hruai thei a ni, tih hi ka ring tlat a ni,” tiin Vidic chuan a sawi bawk.